Me emrin e Allahut, të Gjithëmëshirshmit, Mëshirëplotit
Falënderimet qofshin vetëm për Allahun. Paqja dhe shpëtimet qofshin mbi të dërguarin Muhamed, mbi familjen e tij, si dhe mbi të gjithë pasuesit e tij deri në Ditën e Gjykimit.
Transmetohet nga El Hakem ibën Amër el Gifari (Allahu qoftë i kënaqur prej tij!) se: "I Dërguari i Allahut (Paqja dhe bekimi i Allahut qofshin mbi të!) ka ndaluar që burri të marrë abdes me ujin e mbetur nga gruaja (ku ka marrë abdes).”
E transmetojnë të pestët, vetëm se Ibën Maxheh dhe Nesai thonë: "Në enën ku ka marrë abdes gruaja”.
Tirmidhiu thotë se ky hadith është hasen, ndërsa Ibën Maxheh, pasi transmeton një hadith tjetër pas këtij thotë: "Por i saktë është hadithi i parë.” D.m.th.: hadithi i El Hakemit.
Transmetohet nga Ibën Abasi (Allahu qoftë i kënaqur prej tij!), se i Dërguari i Allahut (Paqja dhe bekimi i Allahut qofshin mbi të!) lahej (merrte gusël) me ujin e mbetur nga Mejmune.
E transmeton Ahmedi dhe Muslimi.
Transmetohet gjithashtu nga Ibën Abasi nga Mejmune se i Dërguari i Allahut (Paqja dhe bekimi i Allahut qofshin mbi të!) mori abdes me ujin e mbetur në enë pas larjes së saj nga xhenabeti.
E transmeton Ahmedi dhe Ibën Maxheh.
Transmetohet gjithashtu nga Ibën Abasi (Allahu qoftë i kënaqur prej tij!) se ka thënë: "Një prej grave të Pejgamberit (Paqja dhe bekimi i Allahut qofshin mbi të!) bëri banjo në një enë me ujë. I Dërguari i Allahut (Paqja dhe bekimi i Allahut qofshin mbi të!) shkoi të merrte abdes –apo të lahej- në atë enë, por ajo i tha: ‘O i Dërguari i Allahut! Unë isha xhunub (kur u lava me ujin e asaj ene)’. Ai (Paqja dhe bekimi i Allahut qofshin mbi të!) tha: ‘Uji nuk bëhet xhunub’.”
E transmeton Ahmedi, Ebu Daudi, En Nesai dhe Tirmidhiu, i cili thotë se ky hadith është hasen sahih.
Them (autori) se shumica e dijetarëve janë të mendimit se i lejohet burrit që marrë abdes me ujin e mbetur nga larja e gruas dhe lajmet për këtë janë më të sakta.
Ndërsa Ahmedi dhe Is’haku e konsiderojnë të papëlqyeshme (të ndaluar) këtë, nëse ajo futet në enë. Kjo është edhe fjala e Abdullah ibën Serxhis. Hadithin e Mejmunes këta e kanë komentuar duke thënë se ajo nuk ka hyrë në të, duke bashkuar dhe harmonizuar kështu ndërmjet hadithit të saj dhe të el Hakemit.
Ndërsa larja e burrit dhe e gruas, si dhe marrja abdes e të dyve së bashku, nuk ka kundërshtim në lejimin e kësaj. Umu Seleme thotë: "Unë dhe i Dërguari i Allahut (Paqja dhe bekimi i Allahut qofshin mbi të!) laheshim me ujin e së njëjtës enë së bashku, dhe kjo për shkak të xhenabetit.” Ky hadith është muttefekun alejhi.
Gjithashtu transmetohet nga Aishja (Allahu qoftë i kënaqur prej saj!) se ka thënë: "Unë dhe i Dërguari i Allahut (Paqja dhe bekimi i Allahut qofshin mbi të!) laheshim me ujin e së njëjtës enë dhe na ngatërroheshin duart me njëri-tjetrin në enë (kur merrnim ujë) dhe kjo ishte nga xhenabeti.” Ky hadith është gjithashtu muttefekun alejhi.
Në një transmetim tjetër të Buhariut thuhet: "Prej një ene të vetme dhe që të dy merrnim ujë me grushtat tanë prej saj.”
Ndërsa në një transmetim të Muslimit thuhet: "Prej së njëjtës enë që ishte mes meje dhe tij. Ai më kalonte mua (i fuste duart për të marrë ujë para saj) dhe unë i thosha: ‘Më lër mua! Më lër mua!’.”
Ndërsa në transmetimin e Nesait thuhet: "Prej së njëjtës enë dhe garonim njëri-tjetrin, saqë ai më thoshte: ‘Më lër mua!’ Dhe unë i thosha: ‘Më lër mua!’.”
Marrë nga libri "Muntek El Ahbar" |