Kushti i Pestë: Dashuria [el-Mehabeh]
Kushti i pestë i dëshmisë La ilahe il-lAllah është dashuria, kusht i cili i kërkon Muslimanit që të ketë dashuri ndaj kësaj dëshmie dhe përmbajtjen e saj, t’i dojë ata që veprojnë në përputhje me këtë dëshmi dhe të jetë i lumtur me të.
Argument për dashurinë është thënia e Allahut të Lartësuar në Kur'an:
"E nga njerëzit ka asish që në vend të All-llahut besojnë idhujt, që i duan (i madhërojnë) ata, sikur (që besimtarët e vërtetë e duan) All-llahun, po dashuria e atyre që besuan All-llahun është shumë më e fortë".[el-Bekare: 165]
"O ju që besuat! Kush largohet prej jush nga feja e vet (i bën dëm vetes) s'ka dyshim se All-llahu do ta sjellë një popull që Ai e do atë (popull) dhe ata e duan Atë (Zotin), (një popull) që është modest e i butë ndaj besimtarëve, por i ashpër dhe i fortë ndaj mohuesve, që lufton në rrugën e All-llahut dhe që nuk i frikësohet kërcënimit të asnjë kërcënuesi"[el-Maide: 54].
Enesi, radij-Allahu anhu, transmeton se i Dërguari i Allahut, sal-lAllahu alejhi ue sel-lem, ka thënë (në kuptimin e hadithit): "Kushdo që i ka këto tri cilësi do ta arrijë ëmbëlsinë e besimit:
1) Të jetë Allahu dhe i Dërguari i Tij më të dashur për të sesa çdo gjë tjetër;
2) Ta dojë një njeri për asgjë tjetër veç se për hir të Allahut;
3) Të urrejë që të kthehet në mosbesim (kufr) pasi që Allahu e shpëtoi atë nga mosbesimi ashtu siç urren që të hidhet në Zjarrin e Xhehenemit.” Transmeton Bukhariu dhe Muslimi.
Dashuria tek fjala La ilahe il-lAllah arrihet nëpërmjet dy gjërave:
E para : Të jesh i sinqertë në adhurimin e Allahut të vetëm e të pashok.
E dyta : Të braktisësh bërjen shirk ndaj Allahut, pra të mos i bësh shok Atij në të gjitha format e adhurimit sepse i gjithë adhurimi i takon vetëm Allahut të Lartësuar, i Pastër është Ai nga çdo gjë që i shoqërojnë njerëzit.
|